Viðurkenning Bestu íslensku vörumerkjanna 2024 fer fram með viðhöfn í Hörpu þann 5. febrúar 2025. Í tilefni þess að viðurkenningarnar eru nú veittar í fimmta sinn mun brandr bjóða til glæsilegs viðburðar sem enginn stjórnandi, markaðsfólk, mannauðsfólk eða annað áhugafólk um vörumerki ætti að láta fram hjá sér fara.

Dagskrá:

• Kl. 14:30 – Húsið opnar. Boðið verður upp á léttar veitingar fyrir framan salinn Kaldalón, með einstöku útsýni yfir norðurhöfnina.
• Kl. 15:00 – Formleg dagskrá hefst.

Viðburðurinn hefst með framsögu Jacob Benbunan, meðstofnanda og framkvæmdastjóra vörumerkjastofunnar Saffron, sem fjallar um vinnustaði sem vörumerki.

Því næst tekur til máls Karen Ósk Gylfadóttir, framkvæmdastjóri Lyfju, sem mun segja frá vegferð vörumerkis Lyfju.

Þriðji fyrirlesarinn, William Bosanko, stjórnandi vörumerkjastofunnar Brandpie, mun ræða hvernig má tengja saman vörumerki, menningu og rekstur.

Eftir stutt hlé mun Friðrik Larsen, stofnandi brandr, leiða létt og lifandi sófaspjall með framáfólki í íslensku viðskiptalífi.

Viðburðurinn nær hápunkti þegar þau vörumerki sem skarað hafa fram úr árið 2024 fá sínar viðurkenningar.